ఆధ్యాత్మిక వికాసానికి యమ– నియమాలు అవసరం!
మనిషిని పతనావస్థకు చేర్చేది అహంకారం!
ధనం, అధికారం, కీర్తి ప్రతిష్టలు అహంకారాన్ని కలిగిస్తాయి!
మాయా అంటే కనకము, కాంతములే!
ఆశే మాయకు మూలం!
దయ కలిగి ఉండుట మోక్ష మార్గ ద్వారం!
మమకారం మోక్షద్వార బంధనం!
“నేను”అనేది తెలుసుకోవడం యోగానికి మూలం!
నీ గురించి నీవు మర్చిపోవటం సమాధి స్థితి!
నేను ఎవరో నాకు తెలియాలి అనుకోవడం జ్ఞాన సాధనకు తొలిమెట్టు!
నీ గురించి నీవు తెలుసుకోవడం ఆత్మజ్ఞానం!
మనసు యొక్క తత్త్వమును తెలుసుకొనుట తత్వ జ్ఞానము!
జపము, ఉపాసన, ప్రాణాయామము, ధ్యానము, తపస్సు అనేవి పంచ సాధనలు!
విషయ వాంఛలకు దూరం అవ్వటం వైరాగ్యం!
విషయ వాసనలకు దూరం అవటం పునః జర్మరహితం!
త్రిగుణాలకు లోబడి పని చేయటం “కర్మ “అవుతుంది!
త్రిగుణ రహితంగా ఉండటం కర్మ నివృత్తి! అదే కర్మ సన్యాసం!
విషయ వాసనలకు లోబడినవాడు భోగి!
విషయ వాసనారహితంగా ఉన్నవాడు యోగి!
ధ్యానములో మనసు పని చేయకపోవటం సమాధి స్థితి!
మనసు–బుద్ధి లోనికి లయము అవడం – సంప్రజ్ఞాత సమాధి!
బుద్ధి–అహంకారములో లయం చెందటం–అసంప్రజ్ఞాత సమాధి!
అహంకారము ఆత్మ యందు లయం చెందటం –నిర్వికల్ప సమాధి!
శుద్ధ ఆత్మ– పరమాత్మ యందు లయం చెందటం – ముక్తి!
ఆలోచనలను శుద్ధి చేయుట ధ్యానము!
నిరంతరము ధ్యానం చేయుట తపస్సు!
మనసును శుద్ధి చేయుట పూజ!
శరీర నాడులను శుద్ధి చేయుట ప్రాణాయామము!
మనసును ఆధీనం చేసుకొనుట జపము!
ఆధీరమైన మనసును స్థిరము చేసుకొనుట ఉపాసన!
శరీరము లేకుండా, అశరీరవాణితో ఇష్టదేవత దర్శనం ఇవ్వడం– దైవ దర్శనం!
సశరీరంలో ఇష్ట దేవతా సాక్షాత్కరించడం– దైవసాక్షాత్కారం!
భ్రుకుటి స్థానంలో జ్యోతి బిందువు దర్శనం– ఆత్మ దర్శనం!
శుద్ధమైన ఆత్మయందు పరమాత్మ ప్రకాశం అనగా సత్ జ్యోతి స్వరూప దర్శనం –పరమాత్మ సాక్షాత్కారం!
సత్ జ్యోతి బిందువులో తన స్వస్వరూపాన్ని చూడటం –ఆత్మసాక్షాత్కారం.!
సహస్ర చక్రములోని వెయ్యి దళాలు వికాసం చెందటం – విశ్వరూప సాక్షాత్కారం!
కారణ దేహమునకు విస్తారత పెరగటం– విశ్వరూప దర్శనం చూపటం!
తత్వమసి అంటే సృష్టి అంతా నువ్వే అయి ఉన్నావని అర్థం!
అహం బ్రహ్మాస్మి అంటే నేనే పరబ్రహ్మాన్ని అర్థం!
నేను కానిది ఏదీ లేదు అని తెలుసుకోవడం ఆత్మజ్ఞానం!
కోపం జయించడానికి ఓర్పుని ఆశ్రయించు!
ఆశని జయించడానికి తృప్తిని ఆశ్రయించు!
అహాన్ని జయించడానికి సేవలను ఆశ్రయించు!
నీ శరీరంతోనే నీ శరీరంలోని దైవాన్ని వెతుకు! ఇదే యోగసాధకుడి లక్ష్యం!
అన్ని భయాల నుండి రక్షించేది మంత్రమే!
తినుట కొరకు జీవించువాడు జీవుడు!
జీవించుట కొరకు తిను వాడు ముక్తుడు!
త్యాగం వల్లే శాంతి లభిస్తుంది!
కర్మఫల త్యాగం వల్ల పరమ శాంతి లభిస్తుంది!
అవసరమైంది అవసరమైనప్పుడు ఇవ్వడం ప్రకృతి లక్షణం!
నిద్ర కోసం పరుండేవాడు సంసారి!
నిద్ర వచ్చినప్పుడు పరుండేవాడు సన్యాసి!
ధ్యానం మానవుడిని మాధవుడిగా చేస్తుంది!
ధ్యానం అంటే కుండలినీ శక్తిని సుషుమ్న మార్గంలోనికి ప్రయాణింప చేయటం!
దేవుడికి, మనిషికి మధ్య ఉన్న ఏకైక సన్నని పొర అహంభావం!
నిద్ర, మెలకువ, కాల కృత్యాల అనంతరం లింగాభిషేకం, ధ్యానం, ఆహారం, నిద్ర ఇవే యోగ సాధకుడి దినచర్య!
ధ్యానంలో ఒక అడుగు భూమి పైకి లేవటం– మూలాధార చక్ర ఆధీనమునకు గుర్తు!
ఇవ్వడం – దయా స్వభావం!
తీసుకోవటం – మాయా స్వభావం!
మంచికి, చెడుకి – మనసే కారణం!
మోక్షం ఉన్నచోట సంసారిక సుఖాలు ఉండవు! భోగలాలస ఉన్నచోట మోక్షం లేదు!
మన ప్రారబ్ద కర్మలను బట్టి మనం ఎప్పుడు ఎలా ఎక్కడ మరణిస్తామో ముందే నిశ్చయమై ఉంటుంది!
సుషుమ్న నాడీ మార్గమునే కుండలినీ అందురు.
శరీరంలోని ప్రాణశక్తియే కుండలినీ శక్తి!
శరీరం నుండి ఆత్మ బయటికి పోవడమే మరణం!
స్థూల, సూక్ష్మ, కారణా శరీరాలను విశ్వశక్తితో నింపి వేయడమే యోగ సాధన!
పునః జన్మలు లేకుండా చేసుకోవడమే ముక్తి!
జీవాత్మ ఆత్మ అని తెలుసుకొనుట ఆత్మ అనుభూతి!
పరిశుద్ధ ఆత్మ విశ్వాత్మమని తెలుసుకొనుట పరబ్రహ్మనుభూతి!
అహంకారానికి విరుగుడు ఓంకారం!
భోగం –పాపం ,భక్తి –పుణ్యం!
ఆత్మకు జీవాత్మకు గల సన్నటి పొర అహంకారం!
పరమాత్మకు ,ఆత్మకు గల సన్నటి పొర “నేను” అనేది!
నేను అనేది నశించుట పరమానందమునకు మూలము!
నేను కానిది ఏదీ లేదు లేదా అంతా నేనే– తనకి భిన్నంగా ఏం లేదు అనుకోవడం ఆత్మ దర్శనానుభూతి
దుఃఖించే సాధకుడు సాధకుడు కాడు!
మానసిక, శారీరక కర్మలే సంసారము!
అహంకారము, గర్వములను విడిచినచో ఆధ్యాత్మికముగా ముందుకు పోగలవు!
సిద్దులను ధనార్జన కోసము, స్వార్థం కోసము, కీర్తి ప్రతిష్టల కోసం వాడితే వారు యోగ భ్రష్టులవుతారు!
మనలను రక్షించువాడు , ఆఖరికి మరణమును ఇచ్చువాడు దేవుడొక్కడే!
మనసు నిలకడగా లేనిచో , అది దేవుడి యందు పూర్తిగా లీనమైనట్లు కాదు!
పరిశుద్ధమైన హృదయమునందు మాత్రమే వివేకం, వైరాగ్యం కలిగి ఆత్మసాక్షాత్కారం కలుగును!
మనసులో రవ్వంత లోభం ఉన్నా ఆధ్యాత్మిక సాధనలన్నియు వ్యర్థమవును.
విడవకుండా ధ్యానం చేసినచో ఆలోచనలు నశించును!
ఈర్ష్యను జయించినచో సంతోషంగా ఉండగలవు!
ధనము కలిగినప్పుడు వినయము నేర్చుకోవలెను!
నేనెవరిని అనే విషయం ఎల్లప్పుడూ ఆలోచిస్తూ ఉండు !ఇదే ముముక్షువు లక్షణం!
సంతోషము దుఃఖము – ఇవి మనసులో కలిగే భ్రమలు మాత్రమే!
కామ – క్రోధముల కలయికయే ఈ సంసారం అని గుర్తుంచుకోండి!
కోరిక అనేది మానసిక బలమును ,నిశ్చలతను భంగపరుచును!
ప్రాపంచిక సంతోషం నిజమైన సంతోషం కాదు!
ముక్తి ఒక్కటే నిజమైన ఆనందం ,నిజమైన సంతోషం!
ఏం బంధం లేనిదే ఎవరు ఎక్కడకు వెళ్ళరు ,వెళ్ళలేరు!
దైవ సంకల్పం లేనిదే ఎవరూ మనల్ని కలవలేరు!
స్త్రీ ,సంపద అనే రెండు ఆధ్యాత్మిక జీవితంలో వచ్చే పెద్ద అడ్డంకులు!
ప్రేమతో నిండిన భక్తి ఉత్తమమైనది! అదే అనన్య భక్తి!
మనం ఎప్పుడూ సూటిగా , నీతిగా పవిత్రంగా ఉండాలి!
ప్రారబ్ధ కర్మలను అనుభవించనిదే శరీరం నుంచి ఆత్మకు విముక్తి లేదు!
యోగము ,త్యాగము, జ్ఞానము, అనన్య భక్తి – ఇవి భగవంతుడిని చేర్చు సాధనాలు!
సత్యము, ధర్మము ,ప్రేమ ,త్యాగము, తృప్తి ,సేవ ,ఓర్పు ఇదే దైవ గుణాలు!
నీటిలో పడవ ఉండాలి గాని పడవలో నీరు ఉండకూడదు!
సంసారములో మానవుడికి కర్తవ్య బుద్ధి, దైవ బుద్ధి ఉండాలే గాని మమకార వ్యామోహ బుద్ధి ఉండకూడదు!
ధర్మయుతంగా నీవు దేనిని అనుభవించినా అది బ్రహ్మానందమే!
ద్వైత స్థితి అనగా భగవంతుడు వేరు– నేను వేరు అనే భావం!
తనకు తాను అనుభవించే స్థితి–అనుభూతి!
మనసుకు, బుద్ధికి అతీతమైన స్థితి– అనుభూతి!
మనసుతో అనుభవించే ధ్యానస్థితి– ధ్యాన అనుభవం!
సంపద,అనునవి నిరంతరం మార్పు చెందే గుణం కలవి!
మనోవేదన వలన పాపక్షయం అగును!
పశ్చాత్తాపమునకు మించిన శిక్ష లేదు!
ఆత్మ దర్శనం వలన ఆత్మ దర్శనానుభూతి కలుగుతుంది!
ఆత్మసాక్షాత్కారం వలన ఆత్మానుభూతి కలుగుతుంది!
భ్రుకుటి యందు జ్యోతి బిందువు దర్శనమే ఆత్మ దర్శనం!
జ్యోతి బిందువు యందు తన స్వస్వరూపాన్ని చూడడం ఆత్మసాక్షాత్కారం!
ఆత్మ దర్శనానుభూతి వలన ద్వైత సిద్ధి వస్తుంది!
బ్రహ్మానందానుభూతి వలన విశిష్టాద్వైత సిద్ధి వస్తుంది!
సవికల్ప సమాధి స్థితి వలన ఆత్మ దర్శనాననుభూతి కలుగుతుంది!
నిర్వికల్ప సమాధి స్థితి వలన ఆత్మానుభూతి కలుగుతుంది!
ఆనంద స్థితి సమాధి స్థితి వలన బ్రహ్మానందానుభూతి కలుగుతుంది!
“నేను” అనేది త్యాగం చేసినప్పుడే పరిపూర్ణ గాన సిద్దుడు అవుతాడు!
ఆజ్ఞా చక్ర తత్వంలో ఆత్మ దర్శనం కలుగుతుంది!
సహస్ర చక్ర తత్వంలో ఆత్మసాక్షాత్కారం కలుగుతుంది!
బ్రహ్మా రంధ్రము వద్ద విశ్వరూప సాక్షాత్కారం కలుగుతుంది!
ఆత్మసాక్షాత్కారమును పరమాత్మ సాక్షాత్కారము లేదా బ్రహ్మ సాక్షాత్కారము అందురు!
విశుద్ధ చక్ర తత్వంలో ప్రారంభ సమాధి స్థితి కలుగుతుంది!
ఆజ్ఞా చక్ర తత్వంలో సవికల్ప సమాధి స్థితి కలుగుతుంది!
సహస్ర చక్ర తత్వంలో నిర్వీకల్ప సమాధి కలుగుతుంది!
బ్రహ్మ రంధ్రం వద్ద ఆనంద సమాధి స్థితి కలుగుతుంది!
ఆనంద సమాధి స్థితిలో కలిగే భావాలను దాటితే అప్పుడు తురియాతీతమైన స్థితి కలుగుతుంది!
జీవుడు తాను ఏమిటో తెలుసుకోవడం ముక్తి!
పరమాత్ముడు తనకు తాను ఏమిటో తెలుసుకోవడం మోక్షం!
ముక్తి వలన మరణానికి భౌతిక మరణం ఇచ్చును!
మోక్షం వలన మరణానికి శాశ్వతమరణం ఇచ్చును!
ముక్తి అనేది జీవుడు పొందుతాడు!
మోక్షం అనేది పరమాత్ముడు పొందుతాడు!
విశ్వంలో గాడ అంధకార శూన్యమే నిరాకార పరబ్రహ్మం!
సత్ జ్యోతి స్వరూపమును పరమాత్మ అందురు !
ఆత్మ జ్యోతి స్వరూపమును ఆత్మ లేదా దైవం అందురు!
విశ్వ శక్తి యొక్క రూపము విశ్వరూప దర్శనము!
విశ్వంలోని శక్తిని విశ్వశక్తి అందురు!
ఈ విశ్వశక్తి మహా కుండలినీ శక్తి లేదా చైతన్య శక్తి లేదా కాస్మిక్ ఎనర్జీ లేదా అయస్కాంత శక్తి లేదా రసాయనక శక్తి!
యోగ సూక్తులు
దీనికి సబ్స్క్రయిబ్ చేయి:
కామెంట్లు (Atom)
కామెంట్లు లేవు:
కామెంట్ను పోస్ట్ చేయండి